ನಿರ್ವಹಣೆಯಿಲ್ಲದೇ ಸೊರಗುತ್ತಿದೆ ಮಣ್ಣಪಳ್ಳ ಕೆರೆ...!

ಮಣಿಪಾಲದ ಹೃದಯ ಭಾಗದಲ್ಲಿರುವ ಮಣ್ಣಪಳ್ಳ ಕೆರೆ ಒಂದು ಕಾಲದಲ್ಲಿ ಪ್ರಕೃತಿ ಸೌಂದರ್ಯದ ಪ್ರತೀಕವಾಗಿತ್ತು. ಬೆಳಗಿನ ಹೊತ್ತಿನಲ್ಲಿ ಮಂಜಿನ ನಡುವೆ ಹೊಳೆಯುತ್ತಿದ್ದ ನೀರಿನ ಮೇಲ್ಮೈ, ಸುತ್ತಮುತ್ತ ಹಸಿರು ಗಿಡಮರಗಳು, ಪಕ್ಷಿಗಳ ಕೂಗು ಇವೆಲ್ಲವು ಸೇರಿ ಈ ಕೆರೆಯನ್ನು ಪ್ರವಾಸಿಗರ ನೆಚ್ಚಿನ ತಾಣವನ್ನಾಗಿಸಿತ್ತು. ಆದರೆ ಇಂದು ಅದೇ ಕೆರೆ ತನ್ನ ದುರವಸ್ಥೆಯನ್ನು ಮೌನವಾಗಿ ಹೇಳಿಕೊಳ್ಳುತ್ತಿರುವಂತೆ ಕಾಣುತ್ತಿದೆ.

ಕೆರೆಯ ಸುತ್ತಮುತ್ತಲಿನ ಪರಿಸ್ಥಿತಿ ಗಮನಿಸಿದರೆ ಅಭಿವೃದ್ಧಿಯ ಕೊರತೆ ಸ್ಪಷ್ಟವಾಗಿ ಗೋಚರಿಸುತ್ತದೆ. ಸರಿಯಾದ ಚರಂಡಿ ವ್ಯವಸ್ಥೆಯಿಲ್ಲದೆ ಮಳೆಯ ನೀರು ಮತ್ತು ಕಸ ನೇರವಾಗಿ ಕೆರೆಗೆ ಸೇರುತ್ತಿದೆ. ಇದರಿಂದ ನೀರಿನ ಗುಣಮಟ್ಟ ಹದಗೆಟ್ಟಿದ್ದು, ಪರಿಸರ ಸಮತೋಲನಕ್ಕೂ ಧಕ್ಕೆಯಾಗಿದೆ. ಗಿಡಗಂಟಿಗಳು ಅತಿಯಾಗಿ ಬೆಳೆದಿದ್ದು, ನಿರ್ಲಕ್ಷ್ಯದ ಗುರುತು ಎಲ್ಲೆಡೆ ಕಾಣಿಸುತ್ತಿದೆ.

ಕೆರೆಯ ಒಳಭಾಗದಲ್ಲಿ ಹೂಳು ತುಂಬಿಕೊಂಡಿರುವುದು ಮತ್ತೊಂದು ಗಂಭೀರ ಸಮಸ್ಯೆ. ವರ್ಷದಿಂದ ವರ್ಷಕ್ಕೆ ಈ ಹೂಳು ಹೆಚ್ಚಾಗುತ್ತಿದ್ದು, ನೀರಿನ ಸಂಗ್ರಹ ಸಾಮರ್ಥ್ಯ ಕುಂಠಿತವಾಗಿದೆ. ಬೇಸಿಗೆಯಲ್ಲಿ ನೀರು ಸಂಪೂರ್ಣವಾಗಿ ಆವಿಯಾಗಿ ಹೋಗುತ್ತಿರುವುದು, ಕೆರೆಯ ಅಸ್ತಿತ್ವವನ್ನೇ ಪ್ರಶ್ನಿಸುವಂತಾಗಿದೆ.

ಮಣಿಪಾಲದ ದೊಡ್ಡ ದೊಡ್ಡ ಅಪಾರ್ಟ್ಮೆಂಟ್ ಗಳ ತ್ಯಾಜ್ಯ ನೀರು ಮಳೆ ನೀರು ಹರಿಯುವ ಚರಂಡಿಯಲ್ಲಿ ಹರಿದು ಮಣ್ಣಪಳ್ಳ ಕೆರೆಯನ್ನು ಸೇರುತ್ತಿವೆ ಎನ್ನುವ ಆರೋಪಗಳು ಕೂಡಾ ಇವೆ. ಹೀಗಾಗಿ ಸ್ವಚ್ಚವಾದ  ಕೆರೆ ನೀರು ಕಂದು ಬಣ್ಣಕ್ಕೆ ತಿರುಗಿದ್ದು, ರೋಗ ಹರಡುವ ಭೀತಿ ಉಂಟಾಗಿದೆ. ಮಣ್ಣಪಳ್ಳ ಕೆರೆಯ ಸುತ್ತ ಇರುವ ವಾಕಿಂಗ್ ಟ್ರ್ಯಾಕ್ ನುದ್ದಕ್ಕೂ ಬೀದಿ ನಾಯಿಗಳ ಹಾವಳಿ ಹೆಚ್ಚಾಗಿದೆ. 

ಮಣ್ಣಪಳ್ಳದಲ್ಲಿ ಸಮರ್ಪಕ ಸ್ವಚ್ಛತೆ, ಚರಂಡಿ ವ್ಯವಸ್ಥೆಯ ಸುಧಾರಣೆ, ಹೂಳು ತೆಗೆಯುವ ಕಾರ್ಯ ಹಾಗೂ ಸುತ್ತಮುತ್ತಲಿನ ಹಸಿರು ವಾತಾವರಣವನ್ನು ಕಾಪಾಡುವ ಕ್ರಮಗಳು ತಕ್ಷಣ ಅಗತ್ಯವಿದೆ. ಸ್ಥಳೀಯ ನಿವಾಸಿಗಳು ಹೇಳುವಂತೆ, ಈ ಪ್ರದೇಶವನ್ನು ಸರಿಯಾಗಿ ಸ್ವಚ್ಛಗೊಳಿಸಿ ಅಭಿವೃದ್ಧಿಪಡಿಸಿದರೆ ಮಕ್ಕಳಿಗೆ ಆಟವಾಡಲು ಸೂಕ್ತವಾದ ಸ್ಥಳವನ್ನಾಗಿ ರೂಪಿಸಬಹುದು. ಸಣ್ಣ ಪಾರ್ಕ್ ನಿರ್ಮಿಸಿದರೆ ಪರಿಸರ ಸುಂದರವಾಗುವುದರ ಜೊತೆಗೆ ಜನರಿಗೆ ವಿಶ್ರಾಂತಿ ಪಡೆಯಲು ಸಹ ಸಹಾಯಕವಾಗುತ್ತದೆ.

ಇಲ್ಲಿ ನಿಯಮಿತ ಸ್ವಚ್ಛತೆ ವ್ಯವಸ್ಥೆ ಜಾರಿಗೊಳಿಸುವುದರ ಜೊತೆಗೆ, ಖಾಲಿ ಜಾಗಗಳನ್ನು ಹಸಿರು ಪ್ರದೇಶಗಳಾಗಿ ಅಭಿವೃದ್ಧಿಪಡಿಸಲು ಯೋಜನೆ ರೂಪಿಸುವ ಅಗತ್ಯವಿದೆ.  ಮಣ್ಣಪಳ್ಳ ಕೆರೆ ಮತ್ತೆ ತನ್ನ ಹಳೆಯ ಸೊಬಗು ಪಡೆದುಕೊಳ್ಳಬೇಕಾದರೆ, ಈಗಲೇ ಕ್ರಮ ಕೈಗೊಳ್ಳಬೇಕು. ಇಲ್ಲದಿದ್ದರೆ ಈ ಪ್ರಕೃತಿ ಸಂಪತ್ತು ಕೇವಲ ನೆನಪಾಗಿ ಉಳಿಯುವ ಅಪಾಯ ಇದೆ.