ಮಹಿಳಾ ಸಬಲೀಕರಣಕ್ಕೆ ‘ಪಿಂಕ್ ಆಟೋ’ ವೇಗ: ಸ್ವಾವಲಂಬಿ ಬದುಕಿಗೆ ‘ಸಖಿ’ಯ ಆಸರೆ
ಮಹಿಳೆಯರು ಕೇವಲ ಆಟೋದಲ್ಲಿ ಪ್ರಯಾಣಿಸುವವರಲ್ಲ, ಆಟೋದ ಸ್ಟೇರಿಂಗ್ ಹಿಡಿದು ಸ್ವಾವಲಂಬಿ ಬದುಕು ಕಟ್ಟಿಕೊಳ್ಳುವವರೂ ಹೌದು ಎಂಬುದನ್ನು ದಕ್ಷಿಣ ಕನ್ನಡ ಜಿಲ್ಲೆಯ ಗುಲಾಬಿ ಬಣ್ಣದ ಪಿಂಕ್ ಆಟೋಗಳು ಸಾರುತ್ತಿವೆ. ಪುರುಷ ಪ್ರಾಬಲ್ಯದ ಆಟೋರಿಕ್ಷಾ ಕ್ಷೇತ್ರದಲ್ಲಿ ಮಹಿಳೆಯರು ಹೊಸ ಹೆಜ್ಜೆಯಿಡುವ ಮೂಲಕ ಸ್ತ್ರೀಶಕ್ತಿಯ ಹೊಸ ಅಧ್ಯಾಯಕ್ಕೆ ನಾಂದಿ ಹಾಡಿದ್ದಾರೆ. ಆರ್ಥಿಕ ಸಂಕಷ್ಟದಲ್ಲಿರುವ ನಿರ್ಗತಿಕ ಮಹಿಳೆಯರಿಗೆ ಉದ್ಯೋಗದ ಅವಕಾಶ ಕಲ್ಪಿಸಿ, ಗೌರವಯುತ ಬದುಕು ಕಟ್ಟಿಕೊಳ್ಳಲು ನೆರವಾಗುತ್ತಿರುವ ರೋಟರಿ ಇಂಟರ್‌ನ್ಯಾಷನಲ್ ಜಿಲ್ಲೆ 3181ರ ‘ಸಖಿ’ ಯೋಜನೆ ಇದೀಗ ಗಮನ ಸೆಳೆಯುತ್ತಿದೆ.
ಮಹಿಳೆಯರ ಸುರಕ್ಷತೆ ಮತ್ತು ಆರ್ಥಿಕ ಸ್ವಾವಲಂಬನೆಯನ್ನು ಉದ್ದೇಶವಾಗಿಟ್ಟುಕೊಂಡು ರೋಟರಿ ಜಿಲ್ಲೆ 3181ರ ಗವರ್ನರ್ ಸತೀಶ್ ಬೋಳಾರ್ ನೇತೃತ್ವದಲ್ಲಿ ಈ ಮಹತ್ವಾಕಾಂಕ್ಷಿ ಯೋಜನೆ ಆರಂಭಿಸಲಾಗಿದೆ. ಗೋವಾದಲ್ಲಿ ನಡೆದ ರೋಟರಿ ತರಬೇತಿ ಕಾರ್ಯಾಗಾರದಲ್ಲಿ ಪಿಂಕ್ ಆಟೋ ಪರಿಕಲ್ಪನೆಯಿಂದ ಪ್ರೇರಿತರಾಗಿ ಜಿಲ್ಲೆಯಲ್ಲಿ ಇದನ್ನು ಅನುಷ್ಠಾನಗೊಳಿಸಲು ನಿರ್ಧರಿಸಲಾಯಿತು. ಸುರತ್ಕಲ್‌ನಿಂದ ಚಾಮರಾಜನಗರದವರೆಗೆ ವ್ಯಾಪಿಸಿರುವ ರೋಟರಿ ಜಿಲ್ಲೆ 3181ರಲ್ಲಿ ಯೋಜನೆಗೆ ಉತ್ತಮ ಸ್ಪಂದನೆ ವ್ಯಕ್ತವಾಗಿದೆ.
ಯೋಜನೆಯಡಿ ಪ್ರತಿ ಆಟೋ ಖರೀದಿಗೆ ರೋಟರಿ ಕ್ಲಬ್‌ಗಳು ₹75,000ರಿಂದ ₹90,000ರವರೆಗೆ ಡೌನ್‌ಪೇಮೆಂಟ್ ಭರಿಸುತ್ತವೆ. ಉಳಿದ ಮೊತ್ತವನ್ನು ಬ್ಯಾಂಕ್ ಸಾಲದ ಮೂಲಕ ಕಡಿಮೆ ಬಡ್ಡಿದರದಲ್ಲಿ ಒದಗಿಸಲಾಗುತ್ತದೆ. ಮಹಿಳೆಯರು ತಮ್ಮ ದುಡಿಮೆಯಿಂದ ಐದು ವರ್ಷಗಳಲ್ಲಿ ಕಂತುಗಳ ಮೂಲಕ ಸಾಲ ಮರುಪಾವತಿಸಬಹುದು. ಟಿವಿಎಸ್ ಮೋಟಾರ್ ಕಂಪನಿಯು ಮಾರುಕಟ್ಟೆ ದರಕ್ಕಿಂತ 20,000ರಿಂದ 30,000ರವರೆಗೆ ರಿಯಾಯಿತಿಯಲ್ಲಿ ಆಟೋಗಳನ್ನು ನೀಡುತ್ತಿದೆ. ಮೈಸೂರಿನ ತಳಿರು ಫೌಂಡೇಶನ್‌ನ ಚಿತ್ರಾ ಹಾಗೂ ಟಿವಿಎಸ್ ಸಂಸ್ಥೆಯ ಸಹಯೋಗದಲ್ಲಿ ಮಹಿಳೆಯರಿಗೆ ಉಚಿತ ಚಾಲನಾ ತರಬೇತಿ ಮತ್ತು ಚಾಲನಾ ಪರವಾನಗಿ ಪಡೆಯಲು ನೆರವು ನೀಡಲಾಗುತ್ತಿದೆ.
ಈಗಾಗಲೇ ಮೈಸೂರಿನಲ್ಲಿ 10, ಬಂಟ್ವಾಳದಲ್ಲಿ ಒಂದು ಹಾಗೂ ಸುಳ್ಯದಲ್ಲಿ ಒಂದು ಸೇರಿ ಒಟ್ಟು 12 ಪಿಂಕ್ ಆಟೋಗಳು ಸಂಚಾರ ಆರಂಭಿಸಿವೆ. ಬಂಟ್ವಾಳದ ಆಟೋವನ್ನು ಮಂಗಳೂರು ಮಿಡ್‌ಟೌನ್ ರೋಟರಿ ಕ್ಲಬ್ ಹಾಗೂ ಸುಳ್ಯದ ಆಟೋವನ್ನು ಸುಳ್ಯ ಸಿಟಿ ರೋಟರಿ ಕ್ಲಬ್ ಪ್ರಾಯೋಜಿಸಿದೆ. ಇನ್ನೂ ಎಂಟು ಆಟೋಗಳು ಉತ್ಪಾದನಾ ಹಂತದಲ್ಲಿದ್ದು, ಶೀಘ್ರದಲ್ಲೇ ವಿತರಣೆಯಾಗಲಿವೆ. ಪ್ರಸಕ್ತ ಸಾಲಿನಲ್ಲಿ ಒಟ್ಟು 50 ಆಟೋಗಳನ್ನು ವಿತರಿಸುವ ಗುರಿಯನ್ನು ರೋಟರಿ ಹೊಂದಿದೆ.
ಸುಳ್ಯದ ಪಿಂಕ್ ಆಟೋ ಚಾಲಕಿ ಗೀತಾ ದಯಾನಂದ ಅವರ ಬದುಕಿನಲ್ಲಿ ಈ ಯೋಜನೆ ಹೊಸ ಭರವಸೆ ಮೂಡಿಸಿದೆ. ಈ ಹಿಂದೆ ಬೇರೆಯವರ ಆಟೋ ಓಡಿಸುತ್ತಿದ್ದ ಅವರು, ದುಡಿಮೆಯ ಬಹುಪಾಲು ಹಣವನ್ನು ವಾಹನದ ಬಾಡಿಗೆಗೇ ನೀಡಬೇಕಾಗಿತ್ತು. ಇದೀಗ ಸುಳ್ಯ ಸಿಟಿ ರೋಟರಿ ಕ್ಲಬ್ ನೆರವಿನಿಂದ ಸ್ವಂತ ಇ-ಆಟೋ ಪಡೆದಿದ್ದಾರೆ. ವಿದ್ಯುತ್ ಚಾಲಿತ ವಾಹನವಾಗಿರುವುದರಿಂದ ಇಂಧನ ವೆಚ್ಚವೂ ಉಳಿತಾಯವಾಗುತ್ತಿದೆ. ಶಾಲಾ ಮಕ್ಕಳು ಮತ್ತು ಮಹಿಳೆಯರು ಸಂತೋಷದಿಂದ ತಮ್ಮ ಆಟೋದಲ್ಲಿ ಪ್ರಯಾಣಿಸುತ್ತಿರುವುದು ಅವರಿಗೆ ಮತ್ತಷ್ಟು ಆತ್ಮವಿಶ್ವಾಸ ನೀಡಿದೆ.
ಇನ್ನು ಬಂಟ್ವಾಳದ ವನಿತಾ ಎಸ್. ಅವರ ಬದುಕಿಗೂ ಪಿಂಕ್ ಆಟೋ ಹೊಸ ಆಸರೆಯಾಗಿದೆ. ವಿಶೇಷ ಆರೈಕೆಯ ಅಗತ್ಯವಿರುವ ಮಗನನ್ನು ಮನೆಯಲ್ಲಿ ಬಿಟ್ಟು ಕೆಲಸಕ್ಕೆ ಹೋಗಲು ಸಾಧ್ಯವಾಗದ ಪರಿಸ್ಥಿತಿ, ಮನೆಯ ಸಾಲದ ಹೊರೆ ಅವರನ್ನು ಸಂಕಷ್ಟಕ್ಕೆ ದೂಡಿತ್ತು. ಇಂತಹ ಸಂದರ್ಭದಲ್ಲಿ ಮಂಗಳೂರು ಮಿಡ್‌ಟೌನ್ ರೋಟರಿ ಕ್ಲಬ್ ಹಾಗೂ ಶ್ರುತಿ ಅವರ ನೆರವಿನಿಂದ ₹65,000 ಡೌನ್‌ಪೇಮೆಂಟ್ ಪಾವತಿಸಿ ಆಟೋ ಒದಗಿಸಲಾಗಿದೆ. ಮಗನನ್ನು ಜೊತೆಯಲ್ಲೇ ಕರೆದೊಯ್ದು ದುಡಿಯಲು ಹಾಗೂ ಆತನ ಚಿಕಿತ್ಸೆಗೆ ನೆರವಾಗಲು ಈ ಯೋಜನೆ ಬಲ ನೀಡಿದೆ.
ಪಿಂಕ್ ಆಟೋ ಯೋಜನೆಯ ಸಂಯೋಜಕಿ ಹಾಗೂ ರೋಟರಿ ಡಿಸ್ಟ್ರಿಕ್ಟ್ 3181ರ ಅಸಿಸ್ಟೆಂಟ್ ಗವರ್ನರ್ ಶ್ರುತಿ ಮಾಡ್ತ ಅವರ ಪ್ರಕಾರ, ನಿರ್ಗತಿಕ ಮಹಿಳೆಯರು ಜಾತಿ-ಭೇದವಿಲ್ಲದೆ ಆರ್ಥಿಕವಾಗಿ ಸ್ವಾವಲಂಬಿಗಳಾಗಿ ಗೌರವಯುತ ಬದುಕು ಕಟ್ಟಿಕೊಳ್ಳಬೇಕು ಎಂಬುದೇ ಯೋಜನೆಯ ಆಶಯ. ಮಂಗಳೂರು ನಗರದಲ್ಲಿ ಪರ್ಮಿಟ್ ಕೊರತೆ ಇರುವುದರಿಂದ ಗ್ರಾಮೀಣ ಹಾಗೂ ಉಪನಗರ ಪ್ರದೇಶದ ಅರ್ಹ ಮಹಿಳೆಯರಿಗೆ ಆದ್ಯತೆ ನೀಡಲಾಗುತ್ತಿದೆ.
ಒಟ್ಟಿನಲ್ಲಿ, ಪಿಂಕ್ ಆಟೋಗಳು ಕೇವಲ ಸಾರಿಗೆ ವಾಹನಗಳಲ್ಲ; ಅವು ಮಹಿಳೆಯರ ಆತ್ಮವಿಶ್ವಾಸ, ಸ್ವಾಭಿಮಾನ ಮತ್ತು ಸ್ವಾವಲಂಬನೆಯ ಸಂಕೇತಗಳಾಗಿವೆ. ಮಹಿಳೆಯರ ಕೈಗೆ ಸ್ಟೇರಿಂಗ್ ನೀಡುವ ಮೂಲಕ ಅವರ ಬದುಕಿನ ದಿಕ್ಕನ್ನೇ ಬದಲಾಯಿಸುತ್ತಿರುವ ‘ಸಖಿ’ ಯೋಜನೆ, ಮಹಿಳಾ ಸಬಲೀಕರಣದ ನಿಟ್ಟಿನಲ್ಲಿ ಇತರರಿಗೂ ಮಾದರಿಯಾಗುತ್ತಿದೆ.