ಭಾರತದ ಸಾರ್ವಭೌಮತ್ವ ರಕ್ಷಿಸಿ: ಅಮೆರಿಕದ ನಿರ್ಬಂಧ ಕಾಯ್ದೆ ತಿರಸ್ಕರಿಸಿ— ಸಿಪಿಐ(ಎಂ)

ರಷ್ಯಾದಿಂದ ತೈಲ ಮತ್ತು ಅನಿಲ ಖರೀದಿಸುವ ದೇಶಗಳ ಮೇಲೆ ಶೇ.100ರವರೆಗೆ ಸುಂಕ ವಿಧಿಸಲು ಅಮೆರಿಕದ ಅಧ್ಯಕ್ಷರಿಗೆ ಅಧಿಕಾರ ನೀಡುವ ಹೊಸ ನಿರ್ಬಂಧ ಕಾಯ್ದೆಯನ್ನು ಸಿಪಿಐ(ಎಂ)  ತೀವ್ರವಾಗಿ ಖಂಡಿಸಿದೆ. ಇತರ ದೇಶಗಳ ವ್ಯಾಪಾರ, ವಿದೇಶಾಂಗ ಹಾಗೂ ಆರ್ಥಿಕ ನೀತಿಗಳನ್ನು ನಿರ್ದೇಶಿಸಲು ಅಮೆರಿಕ ಪ್ರಯತ್ನಿಸುತ್ತಿರುವುದು ಆ ದೇಶಗಳ ಸಾರ್ವಭೌಮತ್ವಕ್ಕೆ ಧಕ್ಕೆ ತರುವ ಕ್ರಮವಾಗಿದೆ ಎಂದು ಸಿಪಿಐ(ಎಂ)  ಪಕ್ಷ ಹೇಳಿದೆ.

ರಷ್ಯಾದಿಂದ ತೈಲ ಆಮದು ಮಾಡಿಕೊಳ್ಳುವ ಪ್ರಮುಖ ದೇಶಗಳಲ್ಲಿ ಭಾರತವೂ ಒಂದಾಗಿದ್ದು, 2026ರ ಜುಲೈನಲ್ಲಿ ಭಾರತದ ಒಟ್ಟು ತೈಲ ಆಮದಿನಲ್ಲಿ ರಷ್ಯಾದ ಪಾಲು ಶೇ.50ಕ್ಕೂ ಅಧಿಕವಾಗಿತ್ತು. ವಿವಿಧ ಮೂಲಗಳ ಪ್ರಕಾರ ಈ ಪ್ರಮಾಣ ಶೇ.51ರಿಂದ 55ರಷ್ಟಿದೆ.

ರಷ್ಯಾದಿಂದ ತೈಲ ಪೂರೈಕೆಯಲ್ಲಿ ಬಲವಂತದ ವ್ಯತ್ಯಯ ಉಂಟಾದರೆ ಅಥವಾ ದುಬಾರಿ ಪರ್ಯಾಯ ಮೂಲಗಳಿಗೆ ಭಾರತ ಅವಲಂಬಿಸಬೇಕಾದರೆ ಇಂಧನ ಬೆಲೆ ಏರಿಕೆಯಾಗುವ ಸಾಧ್ಯತೆಯಿದ್ದು, ಅದರ ಪರಿಣಾಮ ಹಣದುಬ್ಬರ, ಬೆಲೆ ಏರಿಕೆ ಹಾಗೂ ಜನರ ಜೀವನೋಪಾಯದ ಮೇಲೂ ಬೀಳಬಹುದು ಎಂದು ಸಿಪಿಐ(ಎಂ) ಎಚ್ಚರಿಸಿದೆ. ಇರಾನ್‌ನಿಂದ ನಡೆಯುತ್ತಿದ್ದ ತೈಲ ಆಮದು ಈಗಾಗಲೇ ಸ್ಥಗಿತಗೊಂಡಿರುವುದನ್ನೂ ಪಕ್ಷ ಉಲ್ಲೇಖಿಸಿದೆ.

ಅಮೆರಿಕದ ನೂತನ ಕಾಯ್ದೆ ಸೆಪ್ಟೆಂಬರ್ 18ರಂದು ಅಧ್ಯಕ್ಷ ಡೊನಾಲ್ಡ್ ಟ್ರಂಪ್ ಅವರ ಸಹಿಯೊಂದಿಗೆ ಕಾನೂನಾಗಿದೆ. ರಷ್ಯಾದ ತೈಲ ಅಥವಾ ಅನಿಲದ ಪ್ರಮುಖ ಆಮದುದಾರರ ಮೇಲೆ ಶೇ.100ರವರೆಗೆ ಸುಂಕ ವಿಧಿಸುವ ಅಧಿಕಾರವನ್ನು ಈ ಕಾಯ್ದೆ ಅಧ್ಯಕ್ಷರಿಗೆ ನೀಡುತ್ತದೆ; ಆದರೆ ಸುಂಕ ಸ್ವಯಂಚಾಲಿತವಾಗಿ ಜಾರಿಯಾಗುವುದಿಲ್ಲ, ಅಧ್ಯಕ್ಷರ ಕ್ರಮ ಅಗತ್ಯವಾಗಿದೆ. ಕೇಂದ್ರ ವಾಣಿಜ್ಯ ಸಚಿವ ಪಿಯೂಷ್ ಗೋಯಲ್ ಅವರು ಜಿ-20 ವ್ಯಾಪಾರ ಸಚಿವರ ಸಭೆಗಾಗಿ ಅಮೆರಿಕಕ್ಕೆ ತೆರಳುವ ಸಂದರ್ಭದಲ್ಲಿ ಭಾರತದ ನಿಲುವನ್ನು ಸ್ಪಷ್ಟವಾಗಿ ಮಂಡಿಸಿ, ಕಾಯ್ದೆ ರದ್ದುಗೊಳಿಸುವಂತೆ ಒತ್ತಾಯಿಸಬೇಕು. ಭಾರತದ ಆರ್ಥಿಕ ಮತ್ತು ವಿದೇಶಾಂಗ ನೀತಿಯ ನಿರ್ಧಾರಗಳನ್ನು ಯಾವುದೇ ವಿದೇಶಿ ಶಕ್ತಿಯು ನಿರ್ದೇಶಿಸಲು ಅವಕಾಶ ನೀಡಬಾರದು ಎಂದು ಸಿಪಿಐ(ಎಂ)ಕಾರ್ಯದರ್ಶಿ ಸುರೇಶ್ ಕಲ್ಲಾಗರ ಒತ್ತಾಯಿಸಿದ್ದಾರೆ.