ಹೆಣ್ಣು ಸೊಳ್ಳೆಗಳ ಸಂತತಿ ಮುಗಿಸಲು ಗಂಡು ಸೊಳ್ಳೆಗಳನ್ನು ಛೂ ಬಿಟ್ಟ ಆಲ್ಫಾಬೆಟ್...!
ಪ್ರಪಂಚದಾದ್ಯಂತ ಸೊಳ್ಳೆಗಳ ಕಡಿತದಿಂದ ಬರುವ ಡೆಂಗ್ಯು, ಜಿಕಾ ಮತ್ತು ಚಿಕನ್ಗುನ್ಯಾದಂತಹ ರೋಗಗಳಿಗೆ ಕಾರಣವಾಗುವ ಸೊಳ್ಳೆಗಳನ್ನು ನಿಯಂತ್ರಿಸಲು ಹೊಸ ತಂತ್ರಜ್ಞಾನವೊಂದು ಗಮನ ಸೆಳೆಯುತ್ತಿದೆ.
ಗೂಗಲ್ನ ಮಾತೃಸಂಸ್ಥೆಯಾದ Alphabet Inc. ಬೆಂಬಲಿತ ಡಿಬಗ್ ಯೋಜನೆಯಡಿ ಸುಮಾರು 3.2 ಕೋಟಿ ಗಂಡು ಸೊಳ್ಳೆಗಳನ್ನು ಪ್ರಯೋಗಾಲಯದಲ್ಲಿ ಸಿದ್ಧಪಡಿಸಿ ಪರಿಸರಕ್ಕೆ ಬಿಡುಗಡೆ ಮಾಡುವ ಯೋಜನೆ ರೂಪಿಸಲಾಗಿದೆ.
ಈ ಗಂಡು ಸೊಳ್ಳೆಗಳು ಓಲ್ಬಾಚಿಯಾ ಪೈಪಿಯೆಂಟಿಸ್ ಎಂಬ ನೈಸರ್ಗಿಕ ಬ್ಯಾಕ್ಟೀರಿಯಾವನ್ನು ಹೊಂದಿರುತ್ತವೆ. ಇವು ಕಾಡಿನ ಹೆಣ್ಣು ಸೊಳ್ಳೆಗಳೊಂದಿಗೆ ಮಿಲನಗೊಂಡಾಗ, ಅವು ಇಡುವ ಮೊಟ್ಟೆಗಳು ಬೆಳೆಯದೇ ಒಡೆಯುವುದಿಲ್ಲ. ಪರಿಣಾಮವಾಗಿ ಹೊಸ ಸೊಳ್ಳೆಗಳ ಜನನ ಕಡಿಮೆಯಾಗುತ್ತದೆ. ಕ್ರಮೇಣ ಸೊಳ್ಳೆಗಳ ಸಂಖ್ಯೆ ಇಳಿದು, ಅವುಗಳ ಸಂತತಿಯನ್ನೇ ನಿಯಂತ್ರಿಸುವುದು ಈ ಯೋಜನೆಯ ಪ್ರಮುಖ ಉದ್ದೇಶವಾಗಿದೆ.
ಇಲ್ಲಿ ಗಮನಿಸಬೇಕಾದ ಮತ್ತೊಂದು ವಿಷಯವೆಂದರೆ, ಗಂಡು ಸೊಳ್ಳೆಗಳು ರಕ್ತ ಹೀರುವುದಿಲ್ಲ. ಆದ್ದರಿಂದ ಅವು ಮನುಷ್ಯರಿಗೆ ಕಚ್ಚುವುದಿಲ್ಲ ಹಾಗೂ ನೇರ ಅಪಾಯವನ್ನೂ ಉಂಟುಮಾಡುವುದಿಲ್ಲ. ತಜ್ಞರ ಪ್ರಕಾರ, ಇದು ರಾಸಾಯನಿಕ ಕೀಟನಾಶಕಗಳ ಬಳಕೆಯನ್ನು ಕಡಿಮೆ ಮಾಡುವ, ಪರಿಸರ ಸ್ನೇಹಿ ಮತ್ತು ಪರಿಣಾಮಕಾರಿ ಪರ್ಯಾಯ ವಿಧಾನವಾಗಬಹುದು. ಡೆಂಗ್ಯು, ಜಿಕಾ ಮತ್ತು ಚಿಕನ್ಗುನ್ಯಾ ಹರಡುವ ಸೊಳ್ಳೆಗಳ ವಿರುದ್ಧದ ಹೋರಾಟದಲ್ಲಿ ಈ ಯೋಜನೆ ಹೊಸ ಆಶಾಕಿರಣವಾಗಿ ಕಾಣುತ್ತಿದೆ.
ಪ್ರಸ್ತುತ ಈ ಯೋಜನೆಯು United States Environmental Protection Agency ಅಥವಾ ಇಪಿಎಯ ಪರಿಶೀಲನೆಯಲ್ಲಿದ್ದು, ಅನುಮೋದನೆ ದೊರೆತರೆ ಭವಿಷ್ಯದಲ್ಲಿ ದೊಡ್ಡ ಮಟ್ಟದಲ್ಲಿ ಜಾರಿಗೆ ಬರಬಹುದು.
ಸೊಳ್ಳೆಗಳ ವಿರುದ್ಧದ ಹೋರಾಟದಲ್ಲಿ ವಿಜ್ಞಾನ ಮತ್ತೊಂದು ಹೆಜ್ಜೆ ಮುಂದಿಟ್ಟಿದ್ದು, ಈ ಪ್ರಯೋಗ ಯಶಸ್ವಿಯಾದರೆ ಸೊಳ್ಳೆಗಳಿಂದ ಹರಡುವ ರೋಗಗಳ ನಿಯಂತ್ರಣದಲ್ಲಿ ಇದು ಮಹತ್ವದ ಮೈಲಿಗಲ್ಲಾಗಲಿದೆ.