ಕಡಲು ಕಕ್ಕಿದ ಕಸ.. ಮಲ್ಪೆ ತೀರದಲ್ಲಿ ಟನ್ ಗಟ್ಟಲೆ ತ್ಯಾಜ್ಯದ ರಾಶಿ

ಅಬ್ಬರದ ಮಳೆ ಹಾಗೂ ಗಾಳಿಯ ಬಳಿಕ ಮಲ್ಪೆ ಕಡಲ ತೀರದಲ್ಲಿ ಟನ್‌ಗಟ್ಟಲೆ ಕಸದ ರಾಶಿ ಕಾಣಿಸಿಕೊಂಡಿದ್ದು, ಕರಾವಳಿ ಪರಿಸರದ ಮೇಲೆ ಮಾನವ ಚಟುವಟಿಕೆಗಳಿಂದಾಗುತ್ತಿರುವ ದುಷ್ಪರಿಣಾಮಕ್ಕೆ ಕನ್ನಡಿ ಹಿಡಿದಂತಿದೆ. 

ಪ್ರತಿ ವರ್ಷ ಮಳೆಗಾಲದಲ್ಲಿ, ಅದರಲ್ಲೂ ಜೂನ್‌ ತಿಂಗಳಿನಲ್ಲಿ ಕಡಲ ತೀರದಲ್ಲಿ ಈ ರೀತಿಯ ಕಸ ಕಾಣಿಸಿಕೊಳ್ಳುವುದು ಸಾಮಾನ್ಯ. ಆದರೆ ಈ ಬಾರಿ ಮಳೆ ವಿಳಂಬವಾಗಿದ್ದ ಹಿನ್ನೆಲೆಯಲ್ಲಿ ಸಮುದ್ರ ಸೇರಿದ್ದ ಅಪಾರ ಪ್ರಮಾಣದ ಕಸ ಇದೀಗ ಅಲೆಗಳೊಂದಿಗೆ ತೀರಕ್ಕೆ ಬಂದು ರಾಶಿಯಾಗಿ ಬಿದ್ದಿದೆ. ಮಲ್ಪೆ ಬೀಚ್‌ನ ಹಲವು ಭಾಗಗಳಲ್ಲಿ ಪ್ಲಾಸ್ಟಿಕ್ ಬಾಟಲಿಗಳು, ವಿವಿಧ ರೀತಿಯ ಪ್ಲಾಸ್ಟಿಕ್ ತ್ಯಾಜ್ಯ ಸೇರಿದಂತೆ ದೊಡ್ಡ ಪ್ರಮಾಣದ ಕಸ ಹರಡಿಕೊಂಡಿದೆ.

ಮಳೆಗಾಲದಲ್ಲಿ ಸಮುದ್ರ ಅಬ್ಬರಿಸಿದಾಗ ತನ್ನೊಳಗೆ ಸೇರಿಕೊಂಡಿರುವ ಕಸವನ್ನು ಮತ್ತೆ ತೀರಕ್ಕೆ ತಂದು ಹಾಕುತ್ತದೆ. ನದಿ, ಹಳ್ಳ, ಕೊಳ್ಳ ಹಾಗೂ ಇತರ ಜಲಮೂಲಗಳಿಗೆ ಎಸೆಯಲಾಗುವ ಪ್ಲಾಸ್ಟಿಕ್‌ ಸೇರಿದಂತೆ ವಿವಿಧ ತ್ಯಾಜ್ಯಗಳು ಅಂತಿಮವಾಗಿ ಸಮುದ್ರ ಸೇರುತ್ತವೆ. ಬಳಿಕ ಸಮುದ್ರದ ಅಲೆಗಳು ಅವುಗಳನ್ನು ಮತ್ತೆ ಮನುಷ್ಯರ ಕಣ್ಣ ಮುಂದೆಯೇ ತಂದು ನಿಲ್ಲಿಸುತ್ತವೆ.

ಮಲ್ಪೆ ಕಡಲ ತೀರದಲ್ಲಿ ಕಂಡುಬರುತ್ತಿರುವ ಕಸದ ರಾಶಿ, ‘ನಾವು ಪರಿಸರಕ್ಕೆ ಎಸೆದ ಕಸ ನಮ್ಮೆದುರೇ ಪ್ರದರ್ಶನಕ್ಕಿಟ್ಟಂತಿದೆ’ ಎಂಬ ಸಂದೇಶ ನೀಡುವಂತಿದೆ. ನೀರಿಗೆ ಹಾಗೂ ಜಲಮೂಲಗಳಿಗೆ ಕಸ ಎಸೆಯುವುದರಿಂದ ಸಮುದ್ರ ಪರಿಸರ ಮಾತ್ರವಲ್ಲದೆ, ಜಲಚರ ಜೀವಿಗಳು ಮತ್ತು ಮೀನಿನ ಸಂಪತ್ತಿನ ಮೇಲೂ ಗಂಭೀರ ಪರಿಣಾಮ ಬೀರುವ ಆತಂಕವಿದೆ.

ಸಮುದ್ರದ ಆಳಕ್ಕೂ ಪ್ಲಾಸ್ಟಿಕ್ ತ್ಯಾಜ್ಯ ಸೇರುತ್ತಿರುವುದರಿಂದ ಜಲಚರಗಳ ಬದುಕಿಗೂ ಅಪಾಯ ಎದುರಾಗುತ್ತಿದೆ. ಪ್ಲಾಸ್ಟಿಕ್‌ ತುಂಡುಗಳು ಹಾಗೂ ಇತರ ತ್ಯಾಜ್ಯಗಳು ಮೀನು, ಆಮೆ, ಪಕ್ಷಿಗಳು ಸೇರಿದಂತೆ ಹಲವು ಜೀವಿಗಳಿಗೆ ಹಾನಿಕಾರಕವಾಗಬಹುದು. ಇದರ ಪರಿಣಾಮವಾಗಿ ಕರಾವಳಿಯ ಪರಿಸರ ಸಮತೋಲನಕ್ಕೂ ಧಕ್ಕೆಯಾಗುವ ಸಾಧ್ಯತೆ ಇದೆ.

ಮಳೆ ಹಾಗೂ ಗಾಳಿಯ ನಂತರ ಮಲ್ಪೆ ಬೀಚ್‌ನಲ್ಲಿ ಕಂಡುಬರುತ್ತಿರುವ ಈ ದೃಶ್ಯ ಪರಿಸರ ಸಂರಕ್ಷಣೆಯ ಅಗತ್ಯವನ್ನು ಮತ್ತೊಮ್ಮೆ ಎತ್ತಿ ತೋರಿಸಿದೆ. ಕಸವನ್ನು ಎಲ್ಲೆಂದರಲ್ಲಿ ಎಸೆಯದೆ, ವಿಶೇಷವಾಗಿ ನದಿ-ಹಳ್ಳ ಹಾಗೂ ಜಲಮೂಲಗಳಿಗೆ ಪ್ಲಾಸ್ಟಿಕ್ ತ್ಯಾಜ್ಯ ಸೇರುವುದನ್ನು ತಡೆಯುವುದು ಅತ್ಯಗತ್ಯ ಎಂದು ಪರಿಸರ ಪರ ಹೋರಾಟಗಾರರು ತಿಳಿಸಿದ್ದಾರೆ. 

ಕಡಲ ತೀರದಲ್ಲಿ ರಾಶಿಯಾಗಿ ಬಿದ್ದಿರುವ ಕಸ ಕೇವಲ ಸ್ವಚ್ಛತಾ ಸಮಸ್ಯೆಯಲ್ಲ; ಅದು ನಮ್ಮ ಪರಿಸರದ ಮೇಲಿನ ನಿರ್ಲಕ್ಷ್ಯದ ನೇರ ಸಾಕ್ಷಿ. ಈ ದೃಶ್ಯವನ್ನು ನೋಡಿದ ಮೇಲಾದರೂ ಜನರು ಎಚ್ಚೆತ್ತುಕೊಂಡು ‘ಕಸವನ್ನು ನೀರಿಗೆ ಎಸೆಯಬೇಡಿ, ಪರಿಸರವನ್ನು ಉಳಿಸಿ’ ಎಂಬ ಜವಾಬ್ದಾರಿಯ ಸಂದೇಶವನ್ನು ಪಾಲಿಸಬೇಕಿದೆ ಎಂದು ಪರಿಸರ ಪ್ರೇಮಿಗಳು ಎಚ್ಚರಿಸಿದ್ದಾರೆ.